"Suliakka nuannarineqarlutik piumaneqartarmata erinarsuutinili pioreersuni naqitatut ilaanngimmata nuutitai taallaalu nassuiaasilaartarlugit maanna saqqummersippakka, neriullunga inuiaqatigiinnut erinarsoqatigeeqarnikkullu pisuunnguallaataajumaartut angerlarsimaffinnilu atorluarneqartarumaartut"
Erinarsukkat tussiaqattaarutillu saqqummiunneqartut tulliilersorneqarnerisigut tulleeriilluni erinarsoqatigigeeqarnermi nunatsinni nutaajusututuoqaatigineqarsinnaapput. Ernarsuutit amerlanerit erinarsoqatigiit Uummatip Nipaa peqatigalugit immiunneqarnikuupput, taamaalillunilu taakku tusarnaajutigalugit nuutit aamma malinnaavigineqarsinnaallutik.
Organi taalliortoq erinniortorlu Tønnes Kreutzmann, !Anguteeraq", Kangaamiuni 1963-imi inunngorpoq peroriartorlunilu qatanngutigiinni sisamaasuni angajullersaalluni. Ullumikkut nulianilu AngisôK Kreutzmann, Nuummi najugaqarput, sisamanik meeraqarlutik erngutsiorlutillu.
Nuummi oqaluffimmi pattattuusarnermi saniatigut erinarsoqatigiinni Uummatip Nipaa sungiusaasuuffigivai.