AKA Høegh kalaallit nunallu avannarlermiut eqqumiitsulioriaasianni namminerluinnaq pigisaminik assilialioriaaseqarpoq - Kalaallit Nunaata pinngortitarsuanut oqaluttuatoqqallu pissanganartut silarsuaannut atalluinnartumik. Piffissami inuiaqatigiinni pissutsinik allannguerujussuarfiusartumi misigissutsinik nalinginnaasunik pinngortitamillu innarliinnginnissamik pingaartitsinini allanngortinngisaannarpaa.
Oqaluttuatoqqanit pinngortitarsuarmik isiginninnini, sinnattut nunarsuullu kissatsikkiartornera ilutigalugu siunissamik takorluuinini assilianngortittarpai. Annertuumik isiginnilluni eqqarsartarpoq tamannali ilutigalugu aamma maniguuttuuvoq: Nunarsuaq attartuinnarparput, uagullu inuunermi aqqusaartuinnaavugut.
Aka Høegh assigiinngitsorpassuarnik periuseqarluni atortoqarlunilu sulisarpoq - qalipaasiutinik aamma imilertarissanut titartaaffinniit ujaqqanik qiperuinernut, zinkimi kigartukkaniit qalipakkanut pinnersaanermillu sulianut annertoorsuarnut. Taamaalilluni Kalaallit Nunaanni eqqumiitsuliornermik suliallit akornanni annertuumik sunniuteqarluni isummersuisartunilu pingaarnernut ilaavoq, tamannalu ilutigalugu eqqumiitsuliai killeqarfiit akimorlugit nunanut allarpassuarnuttaaq anngussimapput.
MAI MISFELDT Københavnimi Nordatlantens Bryggemi attaveqatigiinnermik suliaqartuuvoq. Qallunaat oqaasii eqqumiitsuliornerullu oqaluttuarisaanera cand.mag-iuffigai aammalu Kristeligt Dagbladimi Berlingske Tidendemilu eqqumiitsuliat attuakkiallu pillugit allaaserinnittartuunikuulluni, ilaasortaaffigaa Statens Kunstfonds Projektstøtteudvalg for Litteratur (2018-21).
Mai Misfeldt ilaatigut Kalaallit Nunaanni peroriartorsimavoq aammalu kalaallit eqqumiitsuliaat atuakkiaallu immikkut soqutigisaqarfigalugit.