"Nipputtartulersuiinnarluta sulissanngilagut"
Atuakkiannguami uani oqaluttuarineqartoq tassaavoq Simon Olsen, Aqqaluk, 1938-imi Sisimiuni inunngortoq, 2013-imilu toqusoq.
Simon Olsen angutaavoq inuttut immikkuullarissusilik, angut suliaminut suliffimminullu tunniusimalluinnartoq ataqqinnittorlu, qiimasoq, pisariaqalerfiatigulli sakkortuunik piumasaqarsinnaassusilik, kalaallip nammineersinnaassuseqarluni sulisinnaaneranik upperinnilluartoq politikeritullu illoqarfimminik pingaartitsilluni annertuumik siuarsaaqataasimasoq.
Kalaallini siullersaalluni 1977-imi Sisimiuni aalisakkanik suliffissuarmi pisortanngorpoq.
Tassaniippoq Siimuup suliaani pingaarnerpaatut taarusutara, tassa inuiaqatigiinni nutaaliaasuni, suliffissuaqarnikkut aalisarluni inuussutissarsiuteqarnerup ingerlalluartinneqarnissaanik nunaqqatiminut inuiaqatiminullu paasisitsiniaalluni maligassiuillunilu annertoorujussuarmik suliaqarsimanera.
Atuakkamili atuarneqarsinnaasutut allarpassuarnik aamma suliaqarsimavoq.