Ilaqutariit tamarmik ersinngitsumik atuagaqarput, oqaluttuanik ulikkaartumik soorunalumi aamma uanga ilaquttanni atuagaqarpoq, oqaluttuassartalimmik oqaluttuallumi amerliartuinnartuullutik.
Piffissammi sekuntii uninneq ajorput. Tamatigut inuunerup ingerlarngata amuarusaartarpai oqaluttuallu nutaat sapanngatut qernertutut qaqortutullu ujalussiamut qajannaatsumut nuiorusaartarpai - tamarmillu qillerput, ilai qilaap ulloriaatut qaammaritsigalutik imaluunniit unnuap taartup ulorianartup isaattut - sapangarli ataaseq sallulluni pigaassaanngilaq aammattaarlu sapannganik allanik avissaartinneqarsinnaanani, tamarmimmi ujallumi ataatsimi nuiorarsimapput taamaallaat qilerneeqqanik akunneqarlutik.
Ilaannikkooriarlunili, atuakkami inigisaq tattorluinnarsisarpoq, oqaluttuallu aniniarsarilersarlutik. Oqaatsillu takisuunngorlutik takkussulersarput, qernertuinnaallutik akiugassaanngitsumik aniniarsarilersarlutik, atuakkap sipinissaa tikillugu taamaasippallu oqaatsit toqqorsivinnit ersinngitsunit anialersarlutik pappialamullu ilaqutariit oqaluttuassartaannut atuarusuttunut tuttarlutik.
Taamatorpiarlu atuagaq una pilersinneqarpoq.